ഉംറ എന്ന വാക്കിനര്‍ത്ഥം സന്ദര്‍ശനം എന്നാകുന്നു. പരിശുദ്ധ കഅ്ബയും സ്വഫാ മര്‍വാ എന്നീ അനുബന്ധ സ്ഥലങ്ങളും സന്ദര്‍ശിച്ച് നിര്‍വഹിക്കുന്ന കര്‍മമായത് കൊണ്ടാണ് ഉംറക്ക് ആ പേര് ലഭിച്ചത്.

ഇസ്‌ലാമില്‍ പുണ്യകര്‍മമാണ് ഉംറ. വിശുദ്ധ ഖുര്‍ആനില്‍ അല്ലാഹു പറയുന്നു: ‘ ഹജ്ജും ഉംറയും നിങ്ങള്‍ അല്ലാഹുവിന് വേണ്ടി പൂര്‍ത്തിയാക്കി ചെയ്യുക.’ (അല്‍ ബഖറ: 196)

ഉംറയുടെ ഭൗതികവും ആത്മീയവുമായ സദ്ഫലങ്ങള്‍ സംബന്ധിച്ച് വിവിധ നബി വചനങ്ങള്‍ വന്നിട്ടുണ്ട്. നബി(സ) പറഞ്ഞതായി അബ്ദുല്ലാഹിബ്‌നു മസ്ഊദ് (റ) റിപ്പോര്‍ട്ട് ചെയ്യുന്നു: ‘ നിങ്ങള്‍ ഹജ്ജും ഉംറയും പരസ്പരം തുടര്‍ത്തി ചെയ്യുക. കാരണം അത് രണ്ടും ദാരിദ്ര്യത്തെയും പാപങ്ങളെയും ദുരീകരിക്കും – ഉല ഇരുമ്പ്, സ്വര്‍ണം,വെള്ളി എന്നിവയിലെ അഴുക്ക് ദുരീകരിക്കുന്നത് പോലെ.’ (തിര്‍മുദി, നസാഇ)

അബൂഹുറൈറ (റ) റിപ്പോര്‍ട്ട് ചെയ്യുന്നു: നബി(സ) പ്രസ്താവിച്ചു: ‘ ഒരു ഉംറ ചെയ്ത ശേഷം സംഭവിക്കുന്ന പാപങ്ങള്‍ അടുത്ത ഉംറയോടുകൂടി മായ്ക്കപ്പെടുന്നതാണ്. ‘ (ബുഖാരി, മുസ്‌ലിം)

ഹജ്ജ് തീര്‍ത്ഥാടകരും ഉംറ നിര്‍വഹിക്കുന്നവരും അല്ലാഹുവിന്റെ നിവേദക സംഘമാണ്. അവര്‍ അവനോട്  പ്രാര്‍ത്ഥിച്ചാല്‍ ഉത്തരം ചെയ്യുകയും പാപമുക്തിക്ക് അര്‍ഥിച്ചാല്‍ പാപമുക്തി നല്‍കുകയും ചെയ്യും എന്ന് നബി(സ) പറഞ്ഞതായി അബൂഹുറൈറ (റ) ഉദ്ധരിക്കുന്നു. (ഇബ്‌നു മാജ, നസാഇ).