| പള്ളികള്‍: നന്മയുടെ വിളക്കുമാടങ്ങള്‍ |
| എഴുതിയത് : പി. അബ്ദുല്‍മജീദ്‌ |
 മൂസാ പറഞ്ഞു: ‘എന്റെ ജനമേ, നിങ്ങള്‍ അല്ലാഹുവില്‍ വിശ്വസിക്കുന്നവരാണെങ്കില്‍ അവനില്‍ ഭരമേല്‍പിക്കുക. നിങ്ങള്‍ മുസ്ലിംകളെങ്കില്‍!’ അപ്പോഴവര്‍ പറഞ്ഞു: ‘ഞങ്ങള്‍ അല്ലാഹുവില്‍ ഭരമേല്‍പിച്ചിരിക്കുന്നു. ഞങ്ങളുടെ നാഥാ, ഞങ്ങളെ നീ അക്രമികളായ ഈ ജനത്തിന്റെ പീഡനങ്ങള്‍ക്കിരയാക്കരുതേ.’നിന്റെ കാരുണ്യത്താല്‍ ഞങ്ങളെ നീ സത്യനിഷേധികളായ ഈ ജനതയില്‍നിന്ന് രക്ഷിക്കേണമേ.’ മൂസാക്കും അദ്ദേഹത്തിന്റെ സഹോദരന്നും നാം ബോധനം നല്‍കി: നിങ്ങളിരുവരും നിങ്ങളുടെ ജനതക്കായി ഈജിപ്തില്‍ ഏതാനും വീടുകള്‍ തയ്യാറാക്കുക. നിങ്ങളുടെ വീടുകളെ നിങ്ങള്‍ ഖിബ്ലകളാക്കുക. നമസ്‌കാരം നിഷ്ഠയോടെ നിര്‍വഹിക്കുക. സത്യവിശ്വാസികളെ ശുഭവാര്‍ത്ത അറിയിക്കുകയും ചെയ്യുക. (യൂനുസ് 84-87)……………………………………………………………………………………………………………………………………ഇസ്‌റാഈല്‍ സമൂഹത്തിന്റെ ശിഥിലമായ അവസ്ഥയെ വ്യക്തമാക്കുന്ന ഖുര്‍ആനിക സൂക്തമാണ് മുകളില്‍ പരാമര്‍ശിച്ചത്. ഇസ്‌റാഈല്‍ വംശം അഭിമുഖീകരിച്ചിരുന്ന കഷ്ട്തകളെക്കുറിച്ച് വിശുദ്ധഖുര്‍ആന്‍ പലയിടത്തായി പരാമര്‍ശിച്ചിട്ടുണ്ട്. സൂറത്തുബഖറയില്‍ അല്ലാഹു പറയുന്നു: ‘ഫറവോന്‍മാരുടെ അടിമത്തത്തില്‍നിന്ന് നാം നിങ്ങളെ മോചിപ്പിച്ചതോര്‍ക്കുക.അവര്‍ നിങ്ങളെ നിഷ്ഠുരമായി പീഡിപ്പിക്കുകയായിരുന്നു. നിങ്ങളുടെ പെണ്ണുങ്ങളെമാത്രം ജീവിക്കാനനുവദിച്ചുകൊണ്ട് ആണ്‍മക്കളെ അവര്‍ അറുകൊല ചെയ്തു. ആ അവസ്ഥയില്‍ റബ്ബിങ്കല്‍നിന്നുള്ള ഭയങ്കരമായ പരീക്ഷണത്തിലകപ്പെട്ടിരുന്നു നിങ്ങള്‍ ‘(അല്‍ബഖറ-49).ഈ തീക്ഷണമായ പരീക്ഷണ സന്ദര്‍ഭത്തില്‍ മൂസാ(അ)ക്ക് തന്റെ ജനങ്ങളെ ആശ്വസിപ്പിക്കാനാവശ്യമായ ഭൗതിക സന്നാഹങ്ങള്‍ ഒന്നുമുണ്ടായിരുന്നില്ല. അദ്ദേഹം പറഞ്ഞു: നിങ്ങള്‍ വിശ്വാസികളാണെങ്കില്‍ അല്ലാഹുവില്‍ ഭരമേല്‍പിക്കുക, നിങ്ങളുടെ മുന്നില്‍ ചെങ്കടലും പിന്നില്‍ ഫറോവയും സംഘവുമുണ്ട് രക്ഷ വേണമെങ്കില്‍ അല്ലാഹുവില്‍ ഭരമേല്‍പിച്ച് അവനോട് പ്രാര്‍ത്ഥിക്കണം. അവരിലെ വിശ്വാസികള്‍ അല്ലാഹുവോട് പ്രാര്‍ത്ഥിച്ചപ്പോള്‍ അല്ലാഹു അവര്‍ക്ക് നല്‍കിയ മറുപടി ഇപ്രകാരമാണ്: നിങ്ങള്‍ ഈജിപ്തില്‍ പള്ളിയുണ്ടാക്കണം, പള്ളിയുണ്ടാക്കാന്‍ കഴിയാത്തവിധം ശക്തമായ നിയമങ്ങളാണ് ഈജിപ്തിലുള്ളതെങ്കില്‍ ആദ്യം വീടുണ്ടാക്കുകയും ആ വീടുകളെ പിന്നീട് സാവധാനം നിയമം അയവ് വരുന്നതിനനുസരിച്ച് പള്ളികളായി പരിവര്‍ത്തിപ്പിക്കണം. വിശുദ്ധ ഖുര്‍ആന്‍ അതിലേക്ക് വിരല്‍ ചൂണ്ടുന്നു: മൂസാക്കും അദ്ദേഹത്തിന്റെ സഹോദരന്നും നാം ബോധനം നല്‍കി: നിങ്ങളിരുവരും നിങ്ങളുടെ ജനതക്കായി ഈജിപ്തില്‍ ഏതാനും വീടുകള്‍ തയ്യാറാക്കുക. നിങ്ങളുടെ വീടുകളെ നിങ്ങള്‍ ഖിബ്ലകളാക്കുക. നമസ്‌കാരം നിഷ്ഠയോടെ നിര്‍വഹിക്കുക. സത്യവിശ്വാസികളെ ശുഭവാര്‍ത്ത അറിയിക്കുകയും ചെയ്യുക. (യൂനുസ് 87) മുകളില്‍ സൂചിപ്പിച്ച ഖുര്‍ആന്‍ വചനങ്ങള്‍ വിശ്വാസി സമൂഹത്തിന് നല്‍കുന്ന വെളിച്ചമിതാണ്: നാട്ടിലെ പള്ളി നമ്മുടെ ആത്മീയ വളര്‍ച്ചയുടെ കേന്ദ്രം മാത്രമല്ല, മറിച്ച്, മൊത്തം സമൂഹത്തിന്റെ വളര്‍ച്ചയുടെ കേന്ദ്രം കൂടിയാണത്. സമൂഹത്തിന് അവിടെ നിന്ന് ആത്മീയ വളര്‍ച്ച മാത്രമല്ല ലഭിക്കേണ്ടത്. സാമൂഹികവും സാമ്പത്തികവുമായ ഉയര്‍ച്ചയുടെ കേന്ദ്രവും അതാവണം. സൂറത്തു ഖുറൈശില്‍ പള്ളി മുഖേനയുണ്ടാകേണ്ട അന്തരീക്ഷത്തെക്കുറിച്ച് പറയുന്നുണ്ട്: ‘അതിനാല്‍ ഈ ഭവനത്തിന്റെ നാഥനെ ആരാധിച്ച് കൊള്ളട്ടെ, (ആനാഥന്‍ ഈ പള്ളി മുഖേന)അവര്‍ക്ക് വിശപ്പിന് പകരം ഭക്ഷണവും ഭയത്തിന് പകരം നിര്‍ഭയവും നല്‍കി'(ഖുറൈശ്:3, 4).
|